ማዕከላዊ መንግሥቱ ኃይል የሚጠቀመው በምን ኹኔታ እና ምን ሲገጥመው ነው? የኢትዮጵያ የባሕር በር ጥያቄ ጉዳይስ? ኢኮኖሚውስ እንዴት ሰንብቷል? በሕዝብ ተወካዮች ምክር ቤት 6^ኛው ዙር፣ 4^ኛ ዓመት የሥራ ዘመን፣ 21^ኛ መደበኛ ስብሰባ ላይ የተገኙት የአገሪቷ ርዕሰመንግሥት፣ ይኽን መሰሎቹን ጥያቄዎች ጨምሮ፣ በዛ ባሉ አገራዊ ጉዳዮች ላይ ምላሾችን ሰጥተዋል፤ አኹናዊ የመንግሥታቸውን አቋሞችም አስረድተዋል። ኢኮኖሚው እንዴት ሰነበተ?

ጠቅላይ ሚኒስትር ዶ.ር. ዐቢይ በኢኮኖሚ ጉዳዮች ላይ በሠጡት ማብራሪያ፣ መንግስት በቀጣዬቹ ዐሥር ዓመታት የሚተገበር የልማት ዕቅድ ስትራቴጂ አዘጋጅቶ ወደ ሥራ መግባቱን ገልጸዋል። ከዚኽ ባለፈም፣ የዐሥር ዓመቱን መሪ ዕቅድ መነሻ ያደረገ የአምስት ዓመት እና የአንድ ዓመት የተግባር ዕቅድ ተዘጋጅቶ ርብርብ እየተደረገ መሆኑንም አብራርተዋል። እንደራሴዎቹ በአገሪቷ ዐቢይ ኢኮኖሚ ዙሪያ ካነሷቸው ጥያቄዎች መካከል፣ በአምራች ዘርፉ ያለውን የጥሬ ዕቃ የአቅርቦት ችግሮች፣ የዐሥር ዓመቱ ዕቅድ ከየት ወዴትነት፣ የነዳጅ ድጎማ እና ሕገ-ወጥ ሽያጭ፣ ተጀምረው የተጓተቱ አገራዊ ፕሮጀክቶች እንዲኹም የአፈር ማዳበሪያ ሥርጭት መዘግየትን የተመለከቱት ጥያቄዎች ዋና ዋናዎቹ ነበሩ። ለእኒህ መሰሎቹ ጥያቄዎች ምላሽ የሰጡት ጠቅላይ ሚኒስትሩም፣ ባለፉት ስምንት ወራት በዋና ዋና የዐቢይ ኢኮኖሚ አመላካቾች ታላላቅ ስኬቶች ተመዝግበዋል ብለዋል።

በተያዘው የበጀት ዓመቱ ቀሪ ወራት ይኽን ስኬት ማጠናከር ከተቻለ፣ ኢትዮጵያ ከ8 ነጥብ 4 በመቶ በላይ የኢኮኖሚ እድገት ታስመዘግባለች ሲሉም ገልጸዋል። ሰው ሰራሽ እና የተፈጥሮ ችግሮች ቢያጋጥሙም፣ ባለፈው ዓመት ኢትዮጵያ 8 ነጥብ 1 በመቶ የኢኮኖሚ እድገት ማስመዝገቧን ያነሱት ዶ.ር. ዐቢይ፣ 3 ነጥብ 5 ቢሊዮን ዶላር ገደማ የዕዳ ሽግሽግ መገኘቱንም ተናግረዋል። በቀደመው ሐምሌ ወር 2016 ዓ.ም. ከተጀመረው ዐቢይ ኢኮኖሚያዊ ማሻሻያ ጋር ተያይዞ በነበረው ድርድር፣ የዕዳ ሽግሽግ ለማድረግ ሲሰራ መቆየቱን የጠቀሱት ጠቅላይ ሚኒስትሩ፣ የኢትዮጵያ አቋም ዕዳ እንዲሰረዝ ማድረግ መኾኑንም ሲናገሩ ተደምጠዋል። አኹን ኢትዮጵያ እየሞከረች ያለችው ከጥቅል አገራዊ ምርቷ ሰባት በመቶ ገደማ ገቢ ለማስገባት መኾኑንም የጠቀሱት ጠቅላይ ሚኒስትሩ፣ በሚቀጥሉት አራት ወራት አኹን ባለው ሂደት ከተኬደ በኢትዮጵያ ታሪክ ውስጥ ታይቶ የማይታወቅ ስኬት ይመዘገባል ብለዋል።

የዋጋ ንረትን እና የኑሮ ውድነትን ለመቀነስ እየተሠራ ያለው ሥራ አበረታች መኾኑን ሲናገሩ የተደመጡት እንደራሴዎቹም፣ የምግብ ዋጋ ግሽበት መቀነሱን አስመልክቶ ሪፖርት ቢቀርብም፣ ሪፖርቱ ከእውነታው ጋር ምን ያክል የተቀራራበ ነው? ሲሉም ጥያቄያቸውን ወርውረዋል። ጠቅላይ ሚኒስትሩ በምላሻቸው፣ የዋጋ ንረትን ለማሻሻል እየተሠራ መኾኑን አንስተው፣ የዋጋ ግሽበትን ግን መቀነስ መቻሉን ተናግረዋል፤ የምርት መጨመር፣ የማክሮ ኢኮኖሚው ማሻሻያ እና ሌሎች ሥራዎች የዋጋ ንረቱን ቀንሰውታል ሲሉም ተሰምተዋል።

ጠቅላይ ሚንስትሩ የታጠቁ ኃይሎችን፣ “አያዋጣም ተዉት” ብለዋል።